Posiblemente sobraban bandeiras, pero onte viuse unha impresionante manifestación en Vigo, na que unhas 40.000 persoas marchaban únicamente detrás dun lema: “Por unha Atención Primaria digna”.
Levaban esa pancarta os MÉDICOS DE FAMILIA (así con maiúsculas) que non puideron aguantar máis a deterioración nas nosas condicións, non xa de traballo, senón de servizo aos nosos pacientes, o verdadeiro fin da nosa nobre profesión.
Alí estabamos, mostrando o noso apoio e compromiso, médicos de todas as áreas de Galicia, médicos dos PAC, sanitarios de todas as categorías e un gran número de cidadáns sen cor política, que entenden que a atención primaria é cousa de todos, e que os recortes na mesma diminúen os seus dereitos e a súa saúde.
Emocionou oír os seus aplausos ao pasar e as súas mostras de apoio e proximidade. Aplaudían aos seus MÉDICOS e esta vez non era polo seu gran esforzo día a día no seu traballo e os seus desvelos polos coidados sanitarios, esta vez era un apoio á súa valentía, a saber dicir Xa abonda! a unha situación insustentable.
Non se reivindicaba nada para nós, os médicos sabemos como movernos polo sistema sanitario, o que pedimos é nin máis nin menos, que recursos, dignidade, respecto e igualdade de servizos ao cidadán independentemente de onde viva. Tan difícil é de entender?
