A xunta directiva de Agamfec quere dirixirse a todos os socios, os profesionais da Atención Primaria, os medios de comunicación, a administración sanitaria e a cidadanía en xeral para explicar o seu apoio á folga convocada en Galicia para os próximos días 9, 10 e 11. Sendo unha sociedade científica que promove o coñecemento e a formación, tamén figura como o seu fin no punto terceiro dos seus estatutos:
“3. Mellorar a calidade da Atención Primaria e de todos os ámbitos profesionais da Medicina Familiar e Comunitaria, dando resposta ás necesidades de saúde dos cidadáns, e con este obxectivo traballar para constituírse nun referente social nestes ámbitos.”
Nesta situación excepcional de emerxencia sanitaria en Galicia e no conxunto do estado, onde a falta de financiamiento ao que nos conduciron as xerencias integradas, a precariedade que exerceron como pretexto da crise, a falta de relevancia do nivel asistencial, o abandono por parte da administración sanitaria, a sobrecarga e falta de tempo para atender a poboación, non podemos mirar para outro lado e poñernos de perfil ante esta deterioración da primaria que alcanza cotas insoportables e dimensións de tormenta perfecta. Temos que dar un paso como referentes que pretendemos ser do nivel asistencial e ante os nosos pacientes, para explicar que non podemos permitir continuar cunha situación que non nos permite dedicarlles o tempo que precisan, a tranquilidade dunha consulta sen abafos que favorecen cometer erros e a falta de seguridade que comporta e a falta de realización de actividades que esta sobrecarga non nos permite. Esta folga é por eles, polos nosos enfermos, pola súa seguridade, para que de verdade sexan o centro do sistema e a Atención Primaria o seu referente. Esperamos que podamos en pouco tempo ter respostas ás nosas demandas, que son a súas.