Sobre o XIDE

A Xunta Directiva de AGAMFEC, trala súa última reunión, quere manifestar a súa opinión sobre o controvertido programa XIDE que ven de implantar a consellería.

A organización médica colexial e algún sindicato avogan pola supresión do programa sen ofrecer unha proposta alternativa que facilite a xestión da demanda en Atención Primaria.

Nós vemos que na teoría o proxecto vai na boa dirección, pretendendo  facilitar a distribución da demanda segundo o motivo de consulta ó profesional máis axeitado e no tempo e forma óptimos. Pero na práctica non resulta eficiente, porque como resulta habitual na consellería respecto da Atención Primaria, quérese facer a custo cero.

Para implantar un programa así hai que multiplicar o número de administrativos (PSX), hai que formalos e elevar o teito competencial de tódalas categorías profesionais.

Ten que dar resposta a totalidade das demandas, non só a sobredemanda.  Se temos as axendas saturadas con citas ineficientes conseguidas por Internet ou polas centrais de chamadas, o programa é un parche , non unha solución. Quere dicir isto que tamén o XIDE se ten que adaptar ás citas solicitadas telematicamente e a través das calls center.

Ademáis, esta inversión tamén inclúe reformas nos centros, xa que preguntar por certos motivos de consulta, como ben sabemos, precisa dun espazo que garanta a intimidade que hoxe non existe en ningunha área administrativa dos nosos  centros de saúde .

E, para ser unha ferramenta que non fomente inequidades, debe ser flexible para adaptarse localmente a calquera tipo de centro (urbán ou rural) e dinámica (mudando rapidamente os seus algoritmos se as circunstancias o precisasen).

A conclusión, por tanto, é a mesma de sempre: necesitamos organización e accesibilidade, pero con investimento en infraestructuras, en persoal e en formación. A Atención Primaria non pode seguir sendo a irmá pobre e a importancia que se lle quere dar ten que ter reflexo orzamentario para ser crible.