Estimados/as asociados/as:
Estase a desenvolver un proxecto de creación de dúas novas UNIDADES DOCENTES CLÍNICAS (UDC) en Vigo e A Coruña co obxectivo de descentralizar a docencia clínica do grao de Medicina (desde 3º curso) nas 3 áreas sanitarias (AS), (Santiago, A Coruña e Vigo). Nos 3 centros impartiríase docencia práctica e teórica.
Aínda está por concretarse como será o procedemento para a implantación das novas unidades: Curso no que se iniciará, n.º de alumnos a asumir en cada AS e incremento progresivo dos mesmos, cronograma, etc.
O profesorado estaría composto por PACS – profesor asociado clínico de ciencias da saúde (non se exixe título de doutor) e Vinculados (PPL – Profesorado permante laboral – titulares, catedráticos) figuras para as que sí se exixe o título de doutor e ademáis pasar a acreditación por parte das axencias nacional (ANECA) ou galega (ACSUG). A validez da acreditación de ACSUG soamente é para as universidades galegas, a de ANECA é para toda España.
Os PACS poden asumir un número limitado de horas de docencia teórica, á marxe das prácticas. Está por definir cómo o profesorado adscrito a outras universidades (Uvigo, U. A Coruña) poderían participar nesta docencia.
Tódolos interesados en formar parte das novas UDC e que estean en posesión do título de doutor deberán realizar as xestións (online) para conseguir a acreditación das axencias (o proceso é tedioso pero non complicado) xa que transcorre un tempo entre que é cursada a solicitude e se obtén unha avaliación positiva ou negativa da axencia (ata 6 meses).
Estase a preparar un informe para entregar na Comisión Mixta SERGAS-USC cun censo potencial de profesores (PACS actuais, profesionais xa acreditados por ANECA/ACSUG ou en proceso de acreditación) así como descrición de infraestruturas e que reflicta como estamos de preparados para asumir este reto.
Polo tanto suxerimos :
1. Aos que sodes doutores:
– Solicitar acreditación ANECA, cantos máis, mellor, XA MESMO.
https://www.aneca.es/procedimiento-de-solicitud
A Academia de Medicina de Familia (AMFE) de Semfyc ten un procedemento para axudarvos na solicitude.
https://www.semfyc.es/semfyc/universidad-amfe/amfe/servicios
2. Ao resto de socios/as suxerímosvos que preparedes o voso CV cos criterios de universidade para ser PACS: con actividades docentes, actividade asistencial, investigación, actividades formativas, etc.
É importante estar atentos ás convocatorias de prazas de PACS para as que, insistimos, non se necesita ser doutor, e pasar a formar parte do profesorado das UDC próximas, onde os médicos/as de familia debemos ter unha presenza importante.
Estamos no principio dun proceso que levará tempo pero non podemos deixalo pasar.
Xunta Directiva de AGAMFEC